Ы.Алтынсарин атындағы Арқалық педагогикалық институтының базасында «Бейорганикалық, аналитикалық, физикалық және коллоидтық химия» және «Адам және жануар анатомиясы мен физиологиясы» атты қос бірдей зертхана ашылды.

Жаңа зертханалар Қазақстан Республикасы Ғылым және жоғары білім министрлігінің Дүниежүзілік банк қаржыландыратын жобалары аясында жабдықталды. Жоба физика, биология, химия және инклюзивті білім беру салаларын дамытуды, білім беру материалдарына қолжетімділікті арттыруды, мультимедиялық жабдықтармен жарақтауды, педагогикалық білімді жаңғыртуды көздейді.
Қазақстан Республикасы мен Дүниежүзілік банк арасындағы келісім шеңберінде жүзеге асырылған «Орта білім беруді жаңғырту» жобасының ауқымы алдағы уақытта Altynsarin institute-да кеңейе бермек.

«Химия, Биология, химия және биология» білім беру бағдарламасының студенттері мен профессор-оқытушылар құрамы үшін эксперименттер жүргізуге арналған ыңғайлы зертхана заманауи технологиялармен жабдықталған.
Мәселен, «Адам және жануар анатомиясы мен физиологиясы» зертханасы «Генетика», «Молекулалық биология», «Адам анатомиясы» және «Адам және жануарлар физиологиясы», «Зоология», «Ботаника», «Жалпы биология», «Өсімдіктер және жануарлар биологиясы» пәндерінен лекциялық, практикалық және зертханалық жұмыстар жүргізуге мүмкіндік береді.
Ал, «Бейорганикалық, аналитикалық, физикалық және коллоидтық химия» зертханасы «Бейорганикалық химия, Аналитикалық химия, Физикалық және коллоидтық химия пәндеріне гидроксидтер, индикаторлар, сульфаттар, сульфиттер, сульфидтер, қышқылдардың ерітінділері және зертханалық жұмыстарға арналған құрылғылармен жабдықталды.
Институт базасында студенттер үшін тәжірибелік алаң құру аса маңызды. Сәйкесінше, қазіргі таңда «Физика» білім беру бағдарламасы үшін жаңа зертхана дайындалу үстінде!
Қолайлы орта – сапалы білімді қамтамасыз етеді!