2020 жылдың 19 ақпаны күні Өмірзақ Сұлтанғазин атындағы Қостанай мемлекеттік педагогикалық университетінде Абай Құнанбайұлының 175 жылдығына орай студенттер арасында аймақтық «Абай оқуларынан» жоғары оқу орындары мен колледж студенттері арасында байқау болып өтті. Байқаудың басты мақсаты: қазақ халқының әдеби мұрасы мен Абай шығармаларын насихаттау, классикалық шығармаларды оқуға студенттерді тарту, Абай шығармалары арқылы көркемдеп оқуды дамыту, тілдік мәдениетті дамыту, ұрпақты ұлы адамдарының шығармаларына және ұлттың рухани мұрасына деген сүйіспеншілікте тәрбиелеу. Студенттер байқаудың «Өлең сөздің патшасы, сөз сарайы», «Абай қара сөздері – тағылымды мұра», «Ұйықтап жатқан жүректі ән оятар» деген атаумен берілген үш номинациясы бойынша жарысқа түсті. Барлығы 68 үміткер қатысқан байқауға республикаға танымал өнер және қоғам қайраткерлері қазылық етті.
Байқауға институт атынан «Абай қара сөздері – тағылымды мұра» номинациясы бойынша «Қазақ тілі мен әдебиеті» мамандығының 1 курс студенті Кендірбекова Ләззат, «Ұйықтап жатқан жүректі ән оятар» номинациясы бойынша «Музыкалық білім» мамандығының 2 курс студенттері Нағашыбаев Жоламан мен Сапарова Мерей қатысты. Байқау қорытындысында Кендірбекова Ләззат жүлделі 2 орынды жеңіп алып, 30 мың теңгенің сертификатына ие болса, Нағашыбаев Жоламан мен Сапарова Мерей Абай Құнанбайұлының бұрын айтылмаған, халыққа жетпеген «Сұрғылт тұман» әнін ерекше дауысымен көрермендерге жеткізе білді. Сол үшін қазылар алқасы студенттердің еңбектерін ерекше атай отырып, арнайы сертификат тапсырды.