Altynsarin Institute-да 16 желтоқсан – Тәуелсіздік күніне арналған декада ұйымдастырылды. «Педагогика және филология», «Жаратылыстану және ақпараттандыру», «Тарих және өнер» факультеті студенттерінің қатысуымен өткен шаралар рухани-адамгершілік, азаматтық-патриоттық тәрбиені дәріптеу, тарихи кезеңдердің мән-мазмұнын ұғындырып, ұлттық мүддеге баулуды мақсат етті.

Декада барысында «Тәуелсіз ел – Қазақстан!» атты дөңгелек үстел, «Тәуелсіздік таңы» тақырыбында академиялық топтарда тәрбие сағаттары, «Тәуелсіздік құндылықтарын қалыптастырудағы мұғалімнің рөлі» атты ашық ойлар алаңы, «Тәуелсіздік тірегім – Қазақстан жүрегім» мерекелік іс-шарасы, «Тәуелсіздік тұтқасы – бізге аманат» атты семинар жұмыстары жүзеге асты.

Тақырыптар аясында Қазақстан Республикасы тарихындағы стратегиялық қадамдар, маңызды бастамалар мен батыл шешімдер, толағай табыстар мен межелі жетістіктер, қым-қуыт кезеңдер мен қиын сәттер қамтылды. Іс-шаралар коллоквиум сұрақтары, зияткер тапсырмалар, сахналық көріністер, шығармашылық шешімдер форматында өрбіп, студенттердің Тәуелсіздік турасындағы түсініктерін кеңейте түсті деуге толық негіз бар.
Сонымен қатар, ақпараттық-кешендік кітапхананың ұйытқы болуымен он күн бойына «Тәуелсіздік тәңірдің ұрпаққа берген бақыты» атты кітап көрмесі көпшіліктің назарына ұсынылды. Оқырмандар көрмеде еліміздің тәуелсіздік алған сәтінен бастап бүгінге дейінгі жүріп өткен жолы туралы баспадан шыққан кітаптар мен мерзімдік басылым беттерімен танысуға мүмкіндік алды.
Студенттер арасында тарихқа құрмет, бабалар аманатын арқалауға деген жауапкершілік сезімдерін ұялатқан 16 желтоқсан – Тәуелсіздік күніне арналған декада барысы жоғары деңгейде өз мәресіне жетті.