Ы.Алтынсарин атындағы АрқПИ-нің бас ғимаратында орналасқан Ақпараттық-кешендік кітапхана базасында «Кітап-Amanat» мәдени-ағартушылық орталығының ашылу салтанаты өтті.

Бұл салтанатты рәсімге «AMANAT» партиясы Арқалық қалалық филиалының төрағасы Тасмағанбет Сабыржан Нұрсалиұлы, Арқалық қалалық мәслихатының төрайымы Елтебаева Гүлбану Төкенқызы, Арқалық қаласы әкімінің орынбасары Жұманов Мешітбай Қайыржанұлы, өңірдің зиялы қауым және жастар өкілдері, Арқалық қалалық мәслихатының фракция депутаттары қатысты.

«Кітап-Amanat» мәдени-ағартушылық орталығы Астана, Шымкент, Жамбыл, Павлодар, Жетісу, Қарағанды және тағы басқа өңірлерде ашылып, көпшіліктің ықыласына бөленген жоба болып отыр.
Жобаның негізгі мақсаты – отандық әдебиетке деген қызығушылықты арттыруға, жұртшылықты оқуға ынталандыруға және отандық авторлар мен кітап шығарушыларды қолдауды көздеп отыр.
«AMANAT» партиясы Арқалық қалалық филиалының төрағасы Тасмағанбет Сабыржан Нұрсалиұлы «Бүгінгі Арқалықта ашылған «КІТАП-AMANAT» кітап дүкені тек кітап сататын орын ғана емес, сонымен қатар мәдени-ағартушылық орталыққа айналуы тиіс. Бұл жер келушілер үшін қазақстандық авторлардың кітаптарын талқылап, келелі кездесулер, оқырман кештері сынды шараларды жергілікті ақын-жазушылардың, мәдениет пен өнер адамдарының, жалпы зиялы қауым өкілдерінің қатысуымен өткізуге ұйытқы болуы қажет», – деді.
Шараның ашылу салтанатында институт ректоры Ержан Әмірбекұлы «Өскелең ұрпақтың тәрбиесі мен біліміне жіті мән беру кітап мазмұнымен егіз түсінік. Біз кітап арқылы ұлттық мүддеге идеологиялық көзқарас таныта аламыз. Жоба аясында тиімді бағада түрлі бағыттағы кітаптарды сату, оны сөрелерге орналастыру студенттер мен қала тұрғындарын кітап оқу мәдениетіне баулитындығына сенімдімін», – деді өз сөзінде.

Айта кетейік, «КІТАП-AMANAT» жобасы Мемлекет басшысы Қасым-Жомарт Тоқаевтың былтыр Түркістанда өткен екінші Ұлттық құрылтайда отандық авторлардың кітаптарын басып шығару мәселесіне қатысты жүзеге асып отыр.